چپ رہوگے تو زمانہ اس سے بد تر آئے گا

چپ رہوگے تو زمانہ اس سے بد تر آئے گا

آنے والا دن لئے ہاتھوں میں خنجر آئے گا

وہ لہو پی کر بڑے انداز سے کہتا ہے یہ

غم کا ہر طوفان اس کے گھر کے باہر آئے گا

کیا تماشا ہے ڈرے سہمے ہوئے ہیں سارے لوگ

کیا مری بستی میں کوئی ظالم افسر آئے گا

لوٹ کر پیچھے کبھی جاتی نہیں رفتار وقت

زندگی کو اب مٹانے کون خود سر آئے گا

میں ہوں اس بزم حسیں کا مدتوں سے منتظر

سب کے ہاتھوں میں جہاں لبریز ساغر آئے گا

تم اسی وادی میں ٹھہرو انتظار اس کا کرو

وہ تمہارے پاس اک پیغام لے کر آئے گا

کوچہ کوچہ سے اٹھے گی غم زدوں کی ایک لہر

قریہ قریہ سے بہی خواہوں کا لشکر آئے گا

ہاتھ میں مشعل لیے ہر سمت پہرے پر رہو

رات کی چادر لپیٹے حملہ آور آئے گا

دیکھ اے سیاح میرے دیس کی اجڑی بہار

اس سے بڑھ کر بھی کوئی غمگین منظر آئے گا

میری سرخیٔ تصور سے ہیں کیوں ناراض آپ

کیا ہرا پیڑ آپ تک بھی پھول لے کر آئے گا

ڈھل چلی دوراںؔ جوانی کی چمکتی دوپہر

اب بھلا پہلو میں میرے کون دلبر آئے گا

chup rahoge to zamana us se bad tar aega

ane wala din liye hathon mein khanjar aega

wo lahu pi kar bare andaz se kahta hai ye

gham ka har tufan us ke ghar ke bahar aega

kya tamasha hai dare sahme hue hain sare log

kya miri basti mein koi zalim afsar aega

laut kar pichhe kabhi jati nahin raftar waqt

zindagi ko ab mitane kaun khud sar aega

main hun is bazm-e-hasin ka muddaton se muntazir

sab ke hathon mein jahan labrez saghar aega

tum isi wadi mein thahro intizar us ka karo

wo tumhare pas ik paigham le kar aega

kucha kucha se uthegi gham zadon ki ek lahr

qarya qarya se bahi khwahon ka lashkar aega

hath mein mashal liye har samt pahre par raho

rat ki chadar lapete hamla awar aega

dekh ai sayyah mere des ki ujri bahar

is se barh kar bhi koi ghamgin manzar aega

meri surkhi-e-tasawwur se hain kyun naraz ap

kya hara per ap tak bhi phul le kar aega

dhal chali dauran jawani ki chamakti dopahar

ab bhala pahlu mein mere kaun dilbar aega