تم آ گئے ہو جب سے کھٹکنے لگی ہے شام

تم آ گئے ہو جب سے کھٹکنے لگی ہے شام

ساغر کی طرح روز چھلکنے لگی ہے شام

شاید کسی کی یاد کا موسم پھر آ گیا

پہلو میں دل کی طرح دھڑکنے لگی ہے شام

کچھ تو ہی اپنے خون رمیدہ کی لے خبر

پلکوں پہ قطرہ قطرہ ٹپکنے لگی ہے شام

صحرائے پر سکوت میں کچھ آہوؤں کے ساتھ

پھر کس کی آرزو میں بھٹکنے لگی ہے شام

کیا جانے آج کیوں کسی مزدور کی طرح

سورج غروب ہوتے ہی تھکنے لگی ہے شام

کچھ اور آئنہ میں سنورنے لگے ہیں وہ

جس دن سے ان پہ جان چھڑکنے لگی ہے شام

دوراںؔ سنا ہے صورت گیسوئے عنبریں

امسال پھر چمن میں مہکنے لگی ہے شام

tum a gae ho jab se khatakne lagi hai sham

saghar ki tarah roz chhalakne lagi hai sham

shayad kisi ki yad ka mausam phir a gaya

pahlu mein dil ki tarah dharakne lagi hai sham

kuchh tu hi apne khun ramida ki le khabar

palkon pe qatra qatra tapakne lagi hai sham

sahrae par sukut mein kuchh ahuon ke sath

phir kis ki arzu mein bhatakne lagi hai sham

kya jane aj kyun kisi mazdur ki tarah

suraj ghurub hote hi thakne lagi hai sham

kuchh aur aina mein sanwarne lage hain wo

jis din se un pe jan chhirakne lagi hai sham

dauran suna hai surat-e-gesu-e-ambarin

imsal phir chaman mein mahakne lagi hai sham