دنیا جہاں کے جام چھلک جائیں ریت پر

دنیا جہاں کے جام چھلک جائیں ریت پر

کیا کیجیے کہ ہونٹ بہک جائیں ریت پر

پانی کی چاہ بھی ہو سمندر کا خوف بھی

لہروں کے ساتھ ساتھ ہمک جائیں ریت پر

گو لاکھ سیپیوں میں سمندر کی قید ہوں

موتی وہی جو پھر بھی جھلک جائیں ریت پر

کاسہ ہر اک صدف کا لٹا جائے اشرفی

لعل و جواہرات کھنک جائیں ریت پر

ٹک آنکھ تو بھی کھول کہ دریا کے لب کھلیں

ساتوں دشا کے دانت چمک جائیں ریت پر

چھن جائیں رس کے فرش سے دھرتی کے غار میں

اور آسماں کی چھت سے ٹپک جائیں ریت پر

رکھیے سفر میں سب کی تن آسانیوں کی خیر

ایسا نہ ہو کہ گھوڑے بدک جائیں ریت پر

سرگوشیوں کی موج کہاں لے کے جائے گی

ہم کچھ اگر جنون میں بک جائیں ریت پر

سورج کہ آسماں پہ ستاروں کو ڈھانپ لے

ذروں سے آفتاب دمک جائیں ریت پر

دل کی دھڑکتی خاک سے ساحل بنائیے

پانی کے پاؤں آج تھرک جائیں ریت پر

duniya jahan ke jam chhalak jaen ret par

kya kijiye ke hont bahak jaen ret par

pani ki chah bhi ho samundar ka khauf bhi

lahron ke sath sath hamak jaen ret par

go lakh sipiyon mein samundar ki qaid hun

moti wahi jo phir bhi jhalak jaen ret par

kasa har ik sadaf ka luta jae ashrafi

laal-o-jawahirat khanak jaen ret par

tuk ankh tu bhi khol ke dariya ke lab khulen

saton dasha ke dant chamak jaen ret par

chhin jaen ras ke farsh se dharti ke ghar mein

aur asman ki chhat se tapak jaen ret par

rakhiye safar mein sab ki tan asaniyon ki khair

aisa na ho ke ghore badak jaen ret par

sargoshiyon ki mauj kahan le ke jaegi

ham kuchh agar junun mein bik jaen ret par

suraj ke asman pe sitaron ko dhanp le

zarron se aftab damak jaen ret par

dil ki dharakti khak se sahil banaiye

pani ke paon aj thirak jaen ret par