محبت جو رکھتی اثر زندگی بھر

محبت جو رکھتی اثر زندگی بھر

نہیں روٹھتا ہم سفر زندگی بھر

ہے کیسی یہ الفت کے تو نے کبھی بھی

نہ رکھی مری کچھ خبر زندگی بھر

لٹاتے رہے وہ جہاں میں محبت

ہمیں ہی کیا در بدر زندگی بھر

خلاصہ بیاں میری آنکھیں کریں گی

اٹھایا نہیں میں نے سر زندگی بھر

کیا قتل ہاتھوں سے جذبوں کا میں نے

جلا کر یہ خون جگر زندگی بھر

بنانا جو چاہا تھا ہاتھوں سے میں نے

بنا ہی نہ پائی وہ گھر زندگی بھر

ہے جو کچھ بھی پایا اسے کھو نہ دیں ہم

ہمیشہ رہا دل میں ڈر زندگی بھر

عداوت محبت سے بہتر ہی ہوگی

رکھی تم نے قائم اگر زندگی بھر

ستم ڈھا رہے ہیں محبت جتا کر

ہے ان کا یہ حسن نظر زندگی بھر

mohabbat jo rakhti asar zindagi bhar

nahin ruthta ham safar zindagi bhar

hai kaisi ye ulfat ke tu ne kabhi bhi

na rakhi miri kuchh khabar zindagi bhar

lutate rahe wo jahan mein mohabbat

hamen hi kiya dar badar zindagi bhar

khulasa bayan meri ankhen karengi

uthaya nahin main ne sar zindagi bhar

kiya qatl hathon se jazbon ka main ne

jala kar ye khun-e-jigar zindagi bhar

banana jo chaha tha hathon se main ne

bana hi na pai wo ghar zindagi bhar

hai jo kuchh bhi paya use kho na den ham

hamesha raha dil mein dar zindagi bhar

adawat mohabbat se behtar hi hogi

rakhi tum ne qaim agar zindagi bhar

sitam dha rahe hain mohabbat jata kar

hai un ka ye husn-e-nazar zindagi bhar