محبت کی صہبا پلانے چلا ہوں

محبت کی صہبا پلانے چلا ہوں

زمانے کو انساں بنانے چلا ہوں

خوشی اہل گلشن کو یہ سن کے ہوگی

مسرت کے نغمے سنانے چلا ہوں

چراغ رخ مہر و انجم کو لے کر

زمانے کی ظلمت مٹانے چلا ہوں

مرا حوصلہ کوئی دیکھے تو آ کر

حریفوں سے نظریں ملانے چلا ہوں

ترے در پہ ذوق جبیں سائی لے کر

مقدر کو پھر آزمانے چلا ہوں

الٰہی خزاں کا بدل جائے چہرہ

چمن میں شگوفے کھلانے چلا ہوں

زمانہ بھی ہو متفق جس سے قیصرؔ

محبت کے وہ گیت گانے چلا ہوں

mohabbat ki sahba pilane chala hun

zamane ko insan banane chala hun

khushi ahl-e-gulshan ko ye sun ke hogi

masarrat ke naghme sunane chala hun

charagh-e-rukh-e-mehr-o-anjum ko le kar

zamane ki zulmat mitane chala hun

mira hausla koi dekhe to a kar

harifon se nazren milane chala hun

tire dar pe zauq-e-jabin sai le kar

muqaddar ko phir azmane chala hun

ilahi khizan ka badal jae chehra

chaman mein shagufe khilane chala hun

zamana bhi ho muttafiq jis se qaisar

mohabbat ke wo git gane chala hun