محبت باعث دیوانگی ہے اور بس میں ہوں

محبت باعث دیوانگی ہے اور بس میں ہوں

کہ اب پیہم عنایت آپ کی ہے اور بس میں ہوں

سکوں حاصل ہے دن میں اور نہ شب کو چین ملتا ہے

کہ اب تو کشمکش میں زندگی ہے اور بس میں ہوں

نہ جانے ماجرا کیا ہے نظر کچھ بھی نہیں آتا

کہ اب حد نظر تک تیرگی ہے اور بس میں ہوں

نہیں ہے آج مجھ کو خدشۂ ظلمت زمانے میں

رخ تاباں کی ان کے روشنی ہے اور بس میں ہوں

قدم کیا ڈگمگائیں گے رہ الفت میں اے ساقی

بہت ہی مختصر سی بے خودی ہے اور بس میں ہوں

ترے نقش قدم پر سر جھکانا کام ہے اپنا

خدا شاہد یہ میری بندگی ہے اور بس میں ہوں

انہیں روداد غم اپنی سناؤں کس طرح قیصرؔ

وہی ان کی ادائے برہمی ہے اور بس میں ہوں

mohabbat bais-e-diwangi hai aur bas mein hun

ke ab paiham inayat ap ki hai aur bas mein hun

sukun hasil hai din mein aur na shab ko chain milta hai

ke ab to kashmakash mein zindagi hai aur bas mein hun

na jane majra kya hai nazar kuchh bhi nahin ata

ke ab had-e-nazar tak tirgi hai aur bas mein hun

nahin hai aj mujh ko khadsha-e-zulmat zamane mein

rukh-e-taban ki un ke raushni hai aur bas mein hun

qadam kya dagmagaenge rah-e-ulfat mein ai saqi

bahut hi mukhtasar si be khudi hai aur bas mein hun

tire naqsh-e-qadam par sar jhukana kam hai apna

khuda shahid ye meri bandagi hai aur bas mein hun

unhen rudad-e-gham apni sunaun kis tarah qaisar

wahi un ki ada-e-barhami hai aur bas mein hun