Arooz is now on the App Store, for iPhone and iPad. Download →

All poetry

کہہ رہی ہے ساری دنیا تیرا دیوانہ مجھے

Qaisar Nizami

کہہ رہی ہے ساری دنیا تیرا دیوانہ مجھے

تیری نظروں نے بنا ڈالا ہے افسانہ مجھے

عشق میں اب مل گئی ہے مجھ کو معراج جنوں

اب تو وہ بھی کہہ رہے ہیں اپنا دیوانہ مجھے

درس عبرت ہے تمہارے واسطے میرا مآل

غنچہ و گل کو سنانا ہے یہ افسانہ مجھے

اک نگاہ ناز نے ساقی کی یہ کیا کر دیا

رفتہ رفتہ کہہ اٹھے سب پیر مے خانہ مجھے

تو سراپا نور ہے میں تیرا عکس خاص ہوں

کہہ رہے ہیں یوں ترا سب آئینہ خانہ مجھے

سن رہی تھی شوق سے دنیا جسے اے ہم نفس

یاد ہے ہاں یاد ہے وہ میرا افسانہ مجھے

نور سے بھر پور ہو جاتی ہے بزم آرزو

جب کبھی وہ دیکھتے ہیں بے حجابانہ مجھے

المدد اے زہد بڑھ کر روک لے میرے قدم

تشنگی پھر لے چلی ہے سوئے مے خانہ مجھے

ہم نفس میری تو فطرت ہی ثنائے حسن ہے

عشق کے بندے کہا کرتے ہیں دیوانہ مجھے

مجھ کو قیصرؔ مے کدے سے نکلے اک مدت ہوئی

یاد کرتے ہیں ابھی تک جام و پیمانہ مجھے