زمانے بھر کو نئی تاب و تب دکھا نہ سکے

زمانے بھر کو نئی تاب و تب دکھا نہ سکے

وہ شخص کیا جو غموں میں بھی مسکرا نہ سکے

ہم اپنے شہر میں رہتے ہیں اجنبی کی طرح

مگر یہ بات کسی کو بھی ہم بتا نہ سکے

گزرتے وقت کی مانند ہے آج کا انساں

صدائیں دے کے اسے ہم کبھی بلا نہ سکے

ضرور رنجش بے جا ہے آپ کو ہم سے

ملے گلے سے مگر دل کبھی ملا نہ سکے

تمہارے وعدے حسیں بھی تھے دل فریب بھی تھے

ہمارے گھر سے غریبی مگر ہٹا نہ سکے

جو بخشتے رہے دنیا کو نور کی دولت

وہ اپنے گھر میں کوئی شمع تک جلا نہ سکے

رہے ہیں گوہرؔ نایاب کی طرح لیکن

ہم اپنے آپ کو شوکیس میں سجا نہ سکے

zamane bhar ko nai tab-o-tab dikha na sake

wo shakhs kya jo ghamon mein bhi muskura na sake

ham apne shahr mein rahte hain ajnabi ki tarah

magar ye bat kisi ko bhi ham bata na sake

guzarte waqt ki manind hai aj ka insan

sadaen de ke use ham kabhi bala na sake

zarur ranjish-e-be ja hai ap ko ham se

mile gale se magar dil kabhi mila na sake

tumhare waade hasin bhi the dil fareb bhi the

hamare ghar se gharibi magar hata na sake

jo bakhshte rahe duniya ko nur ki daulat

wo apne ghar mein koi shama tak jala na sake

rahe hain gauhar-e-nayab ki tarah lekin

ham apne ap ko shokes mein saja na sake