دنیا کی جو خوشی تھی وہ غم سے بدل گئی

دنیا کی جو خوشی تھی وہ غم سے بدل گئی

شاید حیات عشق کے سانچے میں ڈھل گئی

دنیا پھری پھری ہے تمہاری نظر کے ساتھ

تم کیا بدل گئے کہ خدائی بدل گئی

رخ بجلیوں نے موڑ لیا سوئے آشیاں

آئی ہوئی بلا مرے گلشن سے ٹل گئی

دی ہے کسی کی یاد نے دستک کچھ اس طرح

جیسے صبا قریب سے آ کر نکل گئی

میری خوشی کی بات کا اب پوچھنا ہی کیا

میری ہر اک خوشی تو ترے غم میں ڈھل گئی

جس شے کو تم نے دیکھ لیا التفات سے

وہ شے تمہارے حسن کے سانچے میں ڈھل گئی

وہ خیریت کے واسطے آئیں گے گھر مرے

شاید اسی سبب سے طبیعت سنبھل گئی

کتنا قوی جنوں کا ہے رشتہ بہار سے

جب بھی بہار آئی طبیعت مچل گئی

دنیا کو خوش جو دیکھا تو میں مسکرا اٹھا

دنیا نے جب خوشی مری دیکھی تو جل گئی

گوہرؔ گراں ہے میری طبیعت پہ کیف و رنگ

ہاں دیکھ کر خزاں کو طبیعت بہل گئی

duniya ki jo khushi thi wo gham se badal gai

shayad hayat-e-ishq ke sanche mein dhal gai

duniya phiri phiri hai tumhari nazar ke sath

tum kya badal gae ke khudai badal gai

rukh bijliyon ne mor liya su-e-ashiyan

ai hui bala mire gulshan se tal gai

di hai kisi ki yad ne dastak kuchh is tarah

jaise saba qarib se a kar nikal gai

meri khushi ki bat ka ab puchhna hi kya

meri har ik khushi to tire gham mein dhal gai

jis shai ko tum ne dekh liya iltifat se

wo shai tumhare husn ke sanche mein dhal gai

wo khairiyat ke waste aenge ghar mire

shayad isi sabab se tabiat sambhal gai

kitna qawi junun ka hai rishta bahar se

jab bhi bahar ai tabiat machal gai

duniya ko khush jo dekha to main muskura utha

duniya ne jab khushi miri dekhi to jal gai

gauhar giran hai meri tabiat pe kaif-o-rang

han dekh kar khizan ko tabiat bahal gai