ہم آج بہت ان کو خفا دیکھ رہے ہیں

ہم آج بہت ان کو خفا دیکھ رہے ہیں

اے شوخیٔ تقدیر یہ کیا دیکھ رہے ہیں

یہ آپ کی پرسش کا ملا ہے ہمیں انعام

کچھ درد محبت کو سوا دیکھ رہے ہیں

پہچان میں آتے نہیں پہچانے ہوئے لوگ

بدلی ہوئی دنیا کی ہوا دیکھ رہے ہیں

ہم امن کے گھر میں ہیں مگر یہ بھی تو سچ ہے

منڈلاتی ہوئی سر پہ قضا دیکھ رہے ہیں

کچھ اور سوا ہو گئیں بے تابیاں دل کی

کیا خوب یہ تاثیر دعا دیکھ رہے ہیں

ہر سمت اندھیرا ہے اندھیرا ہے اندھیرا

پھیلی ہوئی زلفوں کی گھٹا دیکھ رہے ہیں

کچھ کم نہیں یہ شیخ و برہمن کی کرامات

ہم گوشت سے ناخن کو جدا دیکھ رہے ہیں

لگ جائے گا سورج کو گہن آج یقیناً

رخ کو ترے زلفوں سے گھرا دیکھ رہے ہیں

یہ بات رہے پیش نظر آپ کے گوہرؔ

اب رنگ غزل لوگ نیا دیکھ رہے ہیں

ham aj bahut un ko khafa dekh rahe hain

ai shokhi-e-taqdir ye kya dekh rahe hain

ye ap ki pursish ka mila hai hamen inam

kuchh dard-e-mohabbat ko siwa dekh rahe hain

pahchan mein ate nahin pahchane hue log

badli hui duniya ki hawa dekh rahe hain

ham amn ke ghar mein hain magar ye bhi to sach hai

mandlati hui sar pe qaza dekh rahe hain

kuchh aur siwa ho gain be tabiyan dil ki

kya khub ye tasir-e-dua dekh rahe hain

har samt andhera hai andhera hai andhera

phaili hui zulfon ki ghata dekh rahe hain

kuchh kam nahin ye shaikh-o-barahman ki karamat

ham gosht se nakhun ko juda dekh rahe hain

lag jaega suraj ko gahan aj yaqinan

rukh ko tire zulfon se ghira dekh rahe hain

ye bat rahe pesh-e-nazar ap ke gauhar

ab rang-e-ghazal log naya dekh rahe hain