ہر موسم تپاں میں گل تر لٹائیے

ہر موسم تپاں میں گل تر لٹائیے

جب لوگ تشنہ لب ہوں سمندر لٹائیے

کہتا ہے حرف دوستی اب بھی پکار کے

گھر میں کسی کے آپ نہ پتھر لٹائیے

محلوں میں قہقہوں کی ہے برسات روز و شب

خوشیاں کبھی تو میرے بھی در پر لٹائیے

جب آپ ہو کے شہر فروزاں سے آئے ہیں

تاریکیوں میں نور کی چادر لٹائیے

احباب چاٹ جائیں گے دیمک کی شکل میں

اب دولت خلوص بھی بچ کر لٹائیے

ذہنوں کو تازہ کار بنانے کے واسطے

شعر و سخن کے پھول برابر لٹائیے

گوہرؔ ہے بے بساط ابھی شہر فکر میں

اک دن متاع علم بھی اس پر لٹائیے

har mausam tapan mein gul-e-tar lutaiye

jab log tishna lab hun samundar lutaiye

kahta hai harf-e-dosti ab bhi pukar ke

ghar mein kisi ke ap na patthar lutaiye

mahlon mein qahqahon ki hai barsat roz-o-shab

khushiyan kabhi to mere bhi dar par lutaiye

jab ap ho ke shahr farozan se ae hain

tarikiyon mein nur ki chadar lutaiye

ahbab chat jaenge dimak ki shakl mein

ab daulat khulus bhi bach kar lutaiye

zehnon ko taza kar banane ke waste

sher-o-sukhan ke phul barabar lutaiye

gauhar hai be bisat abhi shahr fikr mein

ik din mata-e-ilm bhi us par lutaiye