روز دل کو مرے اک زخم نیا دیتے ہیں

روز دل کو مرے اک زخم نیا دیتے ہیں

آپ کیا اپنا بنانے کی سزا دیتے ہیں

میری بیتابیٔ دل کا جو اڑاتے ہیں مذاق

وہ بھڑکتے ہوئے شعلوں کو ہوا دیتے ہیں

لوگ کہتے ہیں جسے ظرف وہ اپنا ہے مزاج

اپنے دشمن سے بھی ہم پیار جتا دیتے ہیں

کوئی آواز نہیں ہوتی بھرے برتن سے

اور خالی ہوں تو ہر گام صدا دیتے ہیں

دیکھ کر میرے نشیمن سے دھواں اٹھتا ہوا

سوکھے پتے بھی درختوں کے ہوا دیتے ہیں

زخم دل چاند کی مانند چمکتے ہیں مرے

آپ جب بھولی ہوئی بات سنا دیتے ہیں

آپ چپ چاپ ہی آتے ہیں تصور میں مگر

میرے خوابیدہ خیالوں کو جگا دیتے ہیں

صرف اک دیوتا سمجھا ہے تمہیں میں نے مگر

لوگ پتھر کو بھی بھگوان بنا دیتے ہیں

کچی دیوار کی مانند ہیں ہم اے گوہرؔ

ایک ٹھوکر سے جسے لوگ گرا دیتے ہیں

roz-e-dil ko mire ik zakhm naya dete hain

ap kya apna banane ki saza dete hain

meri betabi-e-dil ka jo urate hain mazaq

wo bharakte hue sholon ko hua dete hain

log kahte hain jise zarf wo apna hai mizaj

apne dushman se bhi ham pyar jata dete hain

koi awaz nahin hoti bhare bartan se

aur khali hun to har gam sada dete hain

dekh kar mere nasheman se dhuan uthta hua

sukhe patte bhi darakhton ke hua dete hain

zakhm-e-dil chand ki manind chamakte hain mire

ap jab bhuli hui bat suna dete hain

ap chup chap hi ate hain tasawwur mein magar

mere khwabida khayalon ko jaga dete hain

sirf ik dewta samjha hai tumhen main ne magar

log patthar ko bhi bhagwan bana dete hain

kachchi diwar ki manind hain ham ai gauhar

ek thokar se jise log gira dete hain