سیم و زر کی کوئی تنویر نہیں چاہتی میں

سیم و زر کی کوئی تنویر نہیں چاہتی میں

کسی شہزادی سی تقدیر نہیں چاہتی میں

مکتب عشق سے وابستہ ہوں کافی ہے مجھے

داد غالبؔ سند میرؔ نہیں چاہتی میں

فیض یابی تری صحبت ہی سے ملتی ہے مجھے

کب ترے عشق کی تاثیر نہیں چاہتی میں

قید اب وصل کے زنداں میں تو کر لے مجھ کو

یہ ترے ہجر کی زنجیر نہیں چاہتی میں

مجھ کو اتنی بھی نہ سکھلا تو نشانہ بازی

تجھ پہ چل جائے مرا تیر نہیں چاہتی میں

اب تو آتا نہیں عنبرؔ وہ کبھی سپنے میں

اب کسی خواب کی تعبیر نہیں چاہتی میں

sim-o-zar ki koi tanwir nahin chahti mein

kisi shahzadi si taqdir nahin chahti mein

maktab-e-ishq se wabasta hun kafi hai mujhe

dad ghalib sanad-e-mir nahin chahti mein

faiz yabi tiri sohbat hi se milti hai mujhe

kab tire ishq ki tasir nahin chahti mein

qaid ab wasl ke zindan mein to kar le mujh ko

ye tire hijr ki zanjir nahin chahti mein

mujh ko itni bhi na sukhla to nishana bazi

tujh pe chal jae mira tir nahin chahti mein

ab to ata nahin ambar wo kabhi sapne mein

ab kisi khwab ki taabir nahin chahti mein