کیا ہے کام یہ لیل و نہار آنکھوں نے

کیا ہے کام یہ لیل و نہار آنکھوں نے

دکھایا جلوۂ پروردگار آنکھوں نے

کبھی دکھایا ہے پژمردہ باغ فصل خزاں

کبھی دکھائی ہے فصل بہار آنکھوں نے

میں اپنے دل پہ یہ الزام دھر نہیں سکتا

تباہ مجھ کو کیا سرمہ دار آنکھوں نے

حدیث دل جو چھپانے کی لاکھ کوشش کی

مگر کیا ہے اسے آشکار آنکھوں نے

ہوئی تھی ماں کی زیارت بھی بعد برسوں کے

بہائے اشک بھی بے اختیار آنکھوں نے

تمہاری راہ کو تک کر اے یوسف دوراں

کیا ہے صبح و مسا انتظار آنکھوں نے

دکھا کے خواب زلیخائے درہم و دینار

کیا ہے دل کو سدا بے قرار آنکھوں نے

تمہاری ایک ہی تصویر ہے جو پاس مرے

اسی کو پیار کیا بار بار آنکھوں نے

یہ اشک اس لیے بہتے ہیں میری آنکھوں سے

کیا ہے خواہش دیدار یار آنکھوں نے

تم ان گناہوں سے توبہ کرو گے کب نوریؔ

کیے گناہ ہیں جو بے شمار آنکھوں نے

kya hai kam ye lail-o-nahar ankhon ne

dikhaya jalwa-e-parwardigar ankhon ne

kabhi dikhaya hai pazhmurda bagh-e-fasl-e-khizan

kabhi dikhai hai fasl-e-bahar ankhon ne

main apne dil pe ye ilzam dhar nahin sakta

tabah mujh ko kiya surma dar ankhon ne

hadis-e-dil jo chhupane ki lakh koshish ki

magar kya hai use ashkar ankhon ne

hui thi man ki ziyarat bhi baad barson ke

bahae ashk bhi be ikhtiyar ankhon ne

tumhari rah ko tak kar ai yusuf-e-dauran

kya hai subh-o-masa intizar ankhon ne

dikha ke khwab-e-zulekha-e-dirham-o-dinar

kya hai dil ko sada be qarar ankhon ne

tumhari ek hi taswir hai jo pas mire

usi ko pyar kiya bar bar ankhon ne

ye ashk is liye bahte hain meri ankhon se

kya hai khwahish-e-didar-e-yar ankhon ne

tum in gunahon se tauba karoge kab nuri

kiye gunah hain jo be shumar ankhon ne