دل کی بربادی میں شامل تھی رضا آنکھوں کی

دل کی بربادی میں شامل تھی رضا آنکھوں کی

اس کی پاداش میں کام آئی ضیا آنکھوں کی

آنکھ ماحول سے جب ترک تعلق کر لے

غور کیجے تو وہ ہوتی ہے انا آنکھوں کی

زیر لب موج تبسم نہ عروسانہ لباس

حسن معصوم کی پہچان حیا آنکھوں کی

حال دل لفظوں کا محتاج ہے یہ کس نے کہا

کوئی سمجھے تو یہ آنسو ہیں صدا آنکھوں کی

ہم کو لے ڈوبے گا یہ ظاہر و باطن کا تضاد

روح کا کرب جدا راہ جدا آنکھوں کی

گوہر اشک کو ارزاں نہیں کرتے یہ لوگ

قدر پہچانتے ہیں اہل وفا آنکھوں کی

آنکھوں والوں نے اڑایا ہے اندھیروں کا مذاق

روشنی چھین نہ لے ان سے خدا آنکھوں کی

اس کو کیا کہتے ہیں اقبالؔ میں کس سے پوچھوں

حسن خود داد طلب اور خطا آنکھوں کی

dil ki barbadi mein shamil thi raza ankhon ki

us ki padash mein kam ai ziya ankhon ki

ankh mahaul se jab tark-e-taalluq kar le

ghaur kije to wo hoti hai ana ankhon ki

zer-e-lab-e-mauj-e-tabassum na urusana libas

husn maasum ki pahchan haya ankhon ki

hal-e-dil lafzon ka mohtaj hai ye kis ne kaha

koi samjhe to ye ansu hain sada ankhon ki

ham ko le dubega ye zahir-o-batin ka tazad

ruh ka karb juda rah juda ankhon ki

gauhar-e-ashk ko arzan nahin karte ye log

qadr pahchante hain ahl-e-wafa ankhon ki

ankhon walon ne uraya hai andheron ka mazaq

raushni chhin na le un se khuda ankhon ki

us ko kya kahte hain iqbal mein kis se puchhun

husn-e-khud dad talab aur khata ankhon ki