سدا رہے گی یہی روانی رواں ہے پانی

سدا رہے گی یہی روانی رواں ہے پانی

بہاؤ اس کا ہے جاودانی رواں ہے پانی

بہاؤ میں بہہ رہے ہیں موسم نگاہ منظر

بہائے جاتا ہے سب کو پانی رواں ہے پانی

کبھی تھے ان راستوں میں قریے مکان چہرے

یہ داستاں ہے مگر پرانی رواں ہے پانی

نہ اب وہ ساحل نہ اب وہ ہستی نہ وہ فصیلیں

نہ اس زمیں کی کوئی نشانی رواں ہے پانی

وہاں وہ اقلیم جس پہ سکہ رواں تھا اپنا

یہاں ہواؤں کی حکمرانی رواں ہے پانی

وہ رات دن بھی اسی روانی میں بہہ چکے ہیں

بکھر چکیں وہ رتیں سہانی رواں ہے پانی

یہاں میں دہرا رہا ہوں پہلے سفر کی باتیں

مگر کہاں اب وہ شادمانی رواں ہے پانی

یہ اشک دھندلا رہے ہیں پیہم مٹا رہے ہیں

نگاہ میں یاد کی کہانی رواں ہے پانی

وہ محفلیں ہیں نہ اب وہ ساتھی رہے ہیں باقی

نہ اب وہ بچپن نہ وہ جوانی رواں ہے پانی

sada rahegi yahi rawani rawan hai pani

bahao us ka hai jawidani rawan hai pani

bahao mein bah rahe hain mausam nigah manzar

bahae jata hai sab ko pani rawan hai pani

kabhi the in raston mein qariye makan chehre

ye dastan hai magar purani rawan hai pani

na ab wo sahil na ab wo hasti na wo fasilen

na is zamin ki koi nishani rawan hai pani

wahan wo iqlim jis pe sikka rawan tha apna

yahan hawaon ki hukmarani rawan hai pani

wo rat din bhi isi rawani mein bah chuke hain

bikhar chuken wo ruten suhani rawan hai pani

yahan main dohra raha hun pahle safar ki baten

magar kahan ab wo shadmani rawan hai pani

ye ashk dhundla rahe hain paiham mita rahe hain

nigah mein yad ki kahani rawan hai pani

wo mahfilen hain na ab wo sathi rahe hain baqi

na ab wo bachpan na wo jawani rawan hai pani