حقیقت کا اگر افسانہ بن جائے تو کیا کیجے

حقیقت کا اگر افسانہ بن جائے تو کیا کیجے

گلے مل کر بھی وہ بیگانہ بن جائے تو کیا کیجے

ہمیں سو بار ترک مے کشی منظور ہے لیکن

نظر اس کی اگر مے خانہ بن جائے تو کیا کیجے

نظر آتا ہے سجدے میں جو اکثر شیخ صاحب کو

وہ جلوہ جلوۂ جانانہ بن جائے تو کیا کیجے

ترے ملنے سے جو مجھ کو ہمیشہ منع کرتا ہے

اگر وہ بھی ترا دیوانہ بن جائے تو کیا کیجے

خدا کا گھر سمجھ رکھا ہے اب تک ہم نے جس دل کو

قتیلؔ اس میں بھی اک بت خانہ بن جائے تو کیا کیجے

haqiqat ka agar afsana ban jae to kya kije

gale mil kar bhi wo begana ban jae to kya kije

hamen sau bar tark-e-mai kashi manzur hai lekin

nazar us ki agar mai khana ban jae to kya kije

nazar ata hai sajde mein jo aksar shaikh sahab ko

wo jalwa jalwa-e-janana ban jae to kya kije

tire milne se jo mujh ko hamesha mana karta hai

agar wo bhi tira diwana ban jae to kya kije

khuda ka ghar samajh rakha hai ab tak ham ne jis dil ko

qatil is mein bhi ik but khana ban jae to kya kije