مست نظروں سے اللہ بچائے مہ جمالوں سے اللہ بچائے

ہر بلا سر پہ آ جائے میری حسن والوں سے اللہ بچائے

ان کی معصومیت پر نہ جانا ان کے دھوکے میں ہرگز نہ آنا

لوٹ لیتے ہیں یہ مسکرا کر ان کی چالوں سے اللہ بچائے

بھولی صورت ہے باتیں ہیں بھولی منہ میں کچھ ہے مگر دل میں کچھ ہے

لاکھ چہرا سہی چاند جیسا دل کے کالوں سے اللہ بچائے

دل میں ہے خواہش حور و جنت اور ظاہر میں شوق عبادت

بس ہمیں شیخ جی آپ جیسے اللہ والوں سے اللہ بچائے

ان کی فطرت میں ہے بے وفائی جانتی ہے یہ ساری خدائی

اچھے اچھوں کو دیتے ہیں دھوکا بھولے بھالوں سے اللہ بچائے