مجھ پر نشاں لگائیے پہلے سوالیے

مجھ پر نشاں لگائیے پہلے سوالیے

پھر مسئلوں کو کھولیے اور حل نکالیے

جذبات آ سکے ہیں کبھی اختیار میں

آنکھوں کی فکر چھوڑیئے دل کو سنبھالیے

وحشت نے میری نیند پہ پہرے لگا دئے

کچھ خواب میری آنکھ کی جانب اچھالیے

وہم و گماں اتار کے پھینکے ہیں اور پھر

ہم نے یقیں کی اون سے خرقے سلا لیے

کم پڑ رہا تھا پہلے ہی کشکول زندگی

اور ہم نے اپنی ذات کے غم بھی اٹھا لیے

کچھ لوگ گاؤں چھوڑ کے شہروں میں جا بسے

باقی کو انتظار کی دیمک نے کھا لیے

فیصلؔ وہ پھر بھی آنکھ پہ ظاہر نہیں ہوا

پردے بھی درمیان سے سارے اٹھا لیے

mujh par nishan lagaiye pahle sawaliye

phir masalon ko kholiye aur hal nikaliye

jazbat a sake hain kabhi ikhtiyar mein

ankhon ki fikr chhoriye dil ko sambhaliye

wahshat ne meri nind pe pahre laga diye

kuchh khwab meri ankh ki janib uchhaliye

wahm-o-guman utar ke phenke hain aur phir

ham ne yaqin ki un se khirqe sula liye

kam par raha tha pahle hi kashkol-e-zindagi

aur ham ne apni zat ke gham bhi utha liye

kuchh log gaon chhor ke shahron mein ja base

baqi ko intizar ki dimak ne kha liye

faisal wo phir bhi ankh pe zahir nahin hua

parde bhi darmiyan se sare utha liye