Arooz is now on the App Store, for iPhone and iPad. Download →

All poetry

کچھ ایسا ربط مسلسل رہا شعور سے بھی

Faisal Nadeem Faisal (b. 1983)

کچھ ایسا ربط مسلسل رہا شعور سے بھی

کہ خوف آنے لگا عشق کے وفور سے بھی

وہ شش جہات سے یکساں دکھائی دیتا ہے

اسے قریب سے دیکھا ہے اور دور سے بھی

ہمارا عشق حقیقت میں غار ثور و حرا

اگرچہ خاص عقیدت ہمیں ہے طور سے بھی

سنا ہے خاص تعلق ہے خارجیت کا

ہماری ذات کے کچھ داخلی امور سے بھی

تبھی تو ذہن پہ حاوی ہے عشق صحرائی

ازل سے دل کے مراسم رہے کھجور سے بھی

یہ اور بات ہے مانو کہ اختلاف کرو

نشانیاں تو ہزاروں ملیں زبور سے بھی

لہو میں رقص کناں عشق ہے مرے فیصلؔ

جڑا ہوا ہے کوئی سلسلہ قصور سے بھی