کچھ سلیقے سے اگر چاک گھمایا جاتا

کچھ سلیقے سے اگر چاک گھمایا جاتا

عین ممکن ہے کہ شہکار بنایا جاتا

جانے والے نے غلط فہمی میں لوٹ آنا تھا

بے خیالی میں بھی گر ہاتھ ہلایا جاتا

عشق منصور کو خود دار تلک لے آیا

اس سے پہلے کہ کوئی حشر اٹھایا جاتا

لوٹنے والا اسی سوچ میں مر جائے گا

کاش زنجیر کو دو بار ہلایا جاتا

رنگ بھرنے میں مصور نے ریا کاری کی

ورنہ تصویر کو مندر میں لگایا جاتا

اس میں وحشت ہے اذیت ہے زبوں حالی ہے

اب یہ کردار نہیں مجھ سے نبھایا جاتا

آپ تو شکل سے لگتے ہیں اداکار مجھے

آپ جیسوں کو نہیں دوست بنایا جاتا

اولیں خط کو جلا کر وہ گنہ گار ہوا

کاش تعظیم سے دریا میں بہایا جاتا

میں نے بدلی ہیں روایات پرانی ورنہ

میں بھی فیصلؔ کسی پٹری سے اٹھایا جاتا

kuchh saliqe se agar chak ghumaya jata

ain mumkin hai ke shahkar banaya jata

jane wale ne ghalat fahmi mein laut ana tha

be khayali mein bhi gar hath hilaya jata

ishq mansur ko khud dar talak le aya

is se pahle ke koi hashr uthaya jata

lautne wala isi soch mein mar jaega

kash zanjir ko do bar hilaya jata

rang bharne mein musawwir ne riya kari ki

warna taswir ko mandir mein lagaya jata

is mein wahshat hai aziyyat hai zabun hali hai

ab ye kirdar nahin mujh se nibhaya jata

ap to shakl se lagte hain adakar mujhe

ap jaison ko nahin dost banaya jata

awwalin khat ko jala kar wo gunah gar hua

kash taazim se dariya mein bahaya jata

main ne badli hain riwayat purani warna

main bhi faisal kisi patri se uthaya jata