منفرد لہجہ جدا طرز بیاں رکھتے ہیں ہم

منفرد لہجہ جدا طرز بیاں رکھتے ہیں ہم

شاعری کے واسطے اردو زباں رکھتے ہیں ہم

یاد جاناں میں گزرتے ہیں ہمارے روز و شب

اور کسی کی یاد کی فرصت کہاں رکھتے ہیں ہم

کون کہتا ہے ہمارے ہاتھ خالی ہو گئے

ماں کی صورت میں متاع دو جہاں رکھتے ہیں ہم

زینت محفل بڑھانے کے لئے اے جان جاں

تیری یادوں کا دیا بھی درمیاں رکھتے ہیں ہم

آسمان غم کا سورج ہم کو کیا جھلسائے گا

تیری الفت کا جو سر پر سائباں رکھتے ہیں ہم

پیش ظالم جرأت اظہار حق ہوتی نہیں

ظاہراً رکھنے کو بس منہ میں زباں رکھتے ہیں ہم

کیا ہوا نوریؔ اگر یہ جسم بوڑھا ہو گیا

جذبۂ عشق و محبت تو جواں رکھتے ہیں ہم

munfarid lahja juda tarz-e-bayan rakhte hain ham

shayari ke waste urdu zaban rakhte hain ham

yad janan mein guzarte hain hamare roz-o-shab

aur kisi ki yad ki fursat kahan rakhte hain ham

kaun kahta hai hamare hath khali ho gae

man ki surat mein mata-e-do jahan rakhte hain ham

zinat-e-mahfil barhane ke liye ai jan-e-jan

teri yadon ka diya bhi darmiyan rakhte hain ham

asman-e-gham ka suraj ham ko kya jhulsaega

teri ulfat ka jo sar par saiban rakhte hain ham

pesh-e-zalim jurat-e-izhar-e-haq hoti nahin

zahiran rakhne ko bas munh mein zaban rakhte hain ham

kya hua nuri agar ye jism burha ho gaya

jazba-e-ishq-o-mohabbat to jawan rakhte hain ham