اگرچہ تم سا بنایا نہیں گیا ہوں میں

اگرچہ تم سا بنایا نہیں گیا ہوں میں

مگر بنا کے مٹایا نہیں گیا ہوں میں

اسے یہ دکھ کہ زمیں تنگ قافیہ مشکل

مجھے یہ دکھ کہ نبھایا نہیں گیا ہوں میں

میں جس طرف سے مکمل دکھائی دیتا ہوں

اسی طرف سے دکھایا نہیں گیا ہوں میں

یہ انکساری ازل سے مرے خمیر میں ہے

جھکا ہوا ہوں جھکایا نہیں گیا ہوں میں

غرور لازمی عنصر تھا اس وزارت کا

سو خود ہٹا ہوں ہٹایا نہیں گیا ہوں میں

میں اپنی ذات میں اک معتبر حوالہ ہوں

کسی کے ساتھ ملایا نہیں گیا ہوں میں

میں مسئلوں میں فلسطین ہوں مگر فیصلؔ

کسی جگہ پہ اٹھایا نہیں گیا ہوں میں

agarche tum sa banaya nahin gaya hun main

magar bana ke mitaya nahin gaya hun main

use ye dukh ke zamin tang qafiya mushkil

mujhe ye dukh ke nibhaya nahin gaya hun main

main jis taraf se mukammal dikhai deta hun

isi taraf se dikhaya nahin gaya hun main

ye inkisari azal se mire khamir mein hai

jhuka hua hun jhukaya nahin gaya hun main

ghurur-e-lazmi unsar tha is wizarat ka

so khud hata hun hataya nahin gaya hun main

main apni zat mein ik motabar hawala hun

kisi ke sath milaya nahin gaya hun main

main masalon mein falstin hun magar faisal

kisi jagah pe uthaya nahin gaya hun main