Arooz is now on the App Store, for iPhone and iPad. Download →

All poetry

مرے ہر نفس میں بسا ہے تو مرے فکر و فن میں قیام ہے

Badiuzzaman Sahar (b. 1944)

مرے ہر نفس میں بسا ہے تو مرے فکر و فن میں قیام ہے

کہ کتاب دل کے ورق ورق میں لکھا ہوا ترا نام ہے

نہ سکون دیر و حرم ملا نہ خدا ملا نہ صنم ملا

ترے دل سے دل جو بہم ملا تو قرار دل بھی مدام ہے

جو چھڑائی مانگ سے کہکشاں تو ستارے کانپ کے رہ گئے

تری زلف ابر کی چھاؤنی ترا چہرہ ماہ تمام ہے

تو جمال بن کے نظر میں آ تو کمال بن کے ہنر پہ چھا

مجھے رات دن تری آرزو تری جستجو مرا کام ہے

ہے صراحی مے سے اٹی ہوئی ہے شراب خم میں بھری ہوئی

ذرا دیکھ ساقیٔ میکدہ مرے ہاتھ میں تہی جام ہے

مرے خواب ریزے سمٹ گئے مرے آنسوؤں کے حصار میں

مری سہمی سہمی سی صبح ہے مری لرزہ لرزہ سی شام ہے