آپ کی مجھ پہ جب بھی نوازش ہوئی

آپ کی مجھ پہ جب بھی نوازش ہوئی

مجھ پہ سنگ ملامت کی بارش ہوئی

زندگی بھر رہے گی مجھے یاد وہ

عشق میں جو مری آزمائش ہوئی

میرا بچپن مجھے یاد آنے لگا

تتلیوں کی جہاں بھی نمائش ہوئی

میرے دامن پہ کیچڑ اچھلتا نہیں

کیا خبر کیا رقیبوں میں سازش ہوئی

جھوٹ تو جھوٹ تھا جھوٹ ہی وہ رہا

بارہا سچ بنانے کی کوشش ہوئی

زلف بکھرائے وہ بام پر آ گئے

جب سہانی رتوں کی سفارش ہوئی

کتنا بد ذوق شہر غزل ہے ظفرؔ

بہرے گونگے کی ہر سو ستائش ہوئی

ap ki mujh pe jab bhi nawazish hui

mujh pe sang-e-malamat ki barish hui

zindagi bhar rahegi mujhe yad wo

ishq mein jo miri azmaish hui

mera bachpan mujhe yad ane laga

titliyon ki jahan bhi numaish hui

mere daman pe kichar uchhalta nahin

kya khabar kya raqibon mein sazish hui

jhut to jhut tha jhut hi wo raha

barha sach banane ki koshish hui

zulf bikhrae wo bam par a gae

jab suhani ruton ki sifarish hui

kitna bad zauq shahr-e-ghazal hai zafar

bahre gunge ki har su sataish hui