Arooz is now on the App Store, for iPhone and iPad. Download →

All poetry

محبت پہ شاید زوال آ رہا ہے

Zafar Ansari Zafar (b. 1976)

محبت پہ شاید زوال آ رہا ہے

کہ اب زندگی کا سوال آ رہا ہے

فضا مہکی مہکی ہے صحن چمن کی

جو آج اک یہاں گل مثال آ رہا ہے

کروں کس طرح ان سے ترک تعلق

مجھے ان کے دل کا خیال آ رہا ہے

یہ کس کے تصور میں اے جان ارماں

تجھے بھی سر بزم حال آ رہا ہے

گزر سا گیا سانحہ کیا چمن میں

گلوں پر جو رنگ ملال آ رہا ہے

یہ دشت ہوس ہے جفاؤں کی دنیا

ادھر کیوں ہجوم غزال آ رہا ہے

وہ بول اٹھے دیکھا جو عاشق کو آتے

ادھر کوئی آشفتہ حال آ رہا ہے

ظفرؔ یہ ہے اس بت کی یادوں کا صدقہ

شب ہجر لطف وصال آ رہا ہے