کوئی تو سوغات اس کے شہر کی گھر لے چلو

کوئی تو سوغات اس کے شہر کی گھر لے چلو

کچھ نہیں تو جسم پر زخموں کی چادر لے چلو

پیار کے بوسیدہ پھولوں کی یہاں قیمت نہیں

شیش محلوں سے گزرنا ہے تو پتھر لے چلو

ہوں گے ارباب تماشا میں کچھ اہل درد بھی

چند آنسو بھی تبسم میں چھپا کر لے چلو

رات جب بھیگی تو سائے نے مجھے آواز دی

میں ہی تنہائی کا ساتھی ہوں مجھے گھر لے چلو

جانے کیسے کیسے صحراؤں میں ہو اپنا گزر

دوستو آنکھوں میں اشکوں کا سمندر لے چلو

داد خواہی کو یہ تنہا زخم سر کافی نہیں

منصفوں کے پاس پتھر بھی اٹھا کر لے چلو

دیر سے صبحیں کھڑی ہیں در پہ آئینہ بدست

زندگی کو اب ذرا خوابوں سے باہر لے چلو

مجرم حق شہر میں میرے سوا کوئی نہیں

سنگ اندازوں کی بستی میں مرا سر لے چلو

رات اس کے لمس کی خوشبو نے چپکے سے کہا

یا یہیں رہ جاؤ تم بھی یا مجھے گھر لے چلو

طاہرؔ اپنے سر کسی کا یہ بھی کیوں احساں رہے

اپنی گردن کے لیے خود اپنا خنجر لے چلو

koi to saughat us ke shahr ki ghar le chalo

kuchh nahin to jism par zakhmon ki chadar le chalo

pyar ke bosida phulon ki yahan qimat nahin

shish mahlon se guzarna hai to patthar le chalo

honge arbab-e-tamasha mein kuchh ahl-e-dard bhi

chand ansu bhi tabassum mein chhupa kar le chalo

rat jab bhigi to sae ne mujhe awaz di

main hi tanhai ka sathi hun mujhe ghar le chalo

jane kaise kaise sahraon mein ho apna guzar

dosto ankhon mein ashkon ka samundar le chalo

dad khwahi ko ye tanha zakhm-e-sar kafi nahin

munsifon ke pas patthar bhi utha kar le chalo

der se subhen khari hain dar pe aina badast

zindagi ko ab zara khwabon se bahar le chalo

mujrim-e-haq shahr mein mere siwa koi nahin

sang andazon ki basti mein mira sar le chalo

rat us ke lams ki khushbu ne chupke se kaha

ya yahin rah jao tum bhi ya mujhe ghar le chalo

tahir apne sar kisi ka ye bhi kyun ehsan rahe

apni gardan ke liye khud apna khanjar le chalo