میں اک بہتا دریا ہوں

میں اک بہتا دریا ہوں

لیکن کتنا پیاسا ہوں

راہ میں گم صم بیٹھا ہوں

اک اک کا منہ تکتا ہوں

تجھ کو اپنا کہتا ہوں

کتنا بھولا بھالا ہوں

دھوپ میں تپتا صحرا ہوں

جنم جنم کا پیاسا ہوں

پھر تجھ تک لوٹ آیا ہوں

شاید کھوٹا سکہ ہوں

اکثر تیرے بارے میں

سپنے دیکھا کرتا ہوں

تو بھی ایک کھلونا ہے

میں بھی ایک کھلونا ہوں

میری فطرت چاند سی ہے

گھٹتا بڑھتا رہتا ہوں

بچوں کی فرمائش پر

جھوٹے وعدے کرتا ہوں

یارو کچھ دم لینے دو

دور سے چل کر آتا ہوں

مستقبل کے بارے میں

کیا کیا سوچا کرتا ہوں

طاہرؔ گھر کی چوکھٹ پر

جانے کیوں چپ بیٹھا ہوں

main ik bahta dariya hun

lekin kitna pyasa hun

rah mein gum sum baitha hun

ik ik ka munh takta hun

tujh ko apna kahta hun

kitna bhula bhala hun

dhup mein tapta sahra hun

janam janam ka pyasa hun

phir tujh tak laut aya hun

shayad khota sikka hun

aksar tere bare mein

sapne dekha karta hun

tu bhi ek khilauna hai

main bhi ek khilauna hun

meri fitrat chand si hai

ghatta barhta rahta hun

bachchon ki farmaish par

jhute waade karta hun

yaro kuchh dam lene do

dur se chal kar ata hun

mustaqbil ke bare mein

kya kya socha karta hun

tahir ghar ki chaukhat par

jane kyun chup baitha hun