اک دن زباں سکوت کی پوری بناؤں گا

اک دن زباں سکوت کی پوری بناؤں گا

میں گفتگو کو غیر ضروری بناؤں گا

تصویر میں بناؤں گا دونوں کے ہاتھ اور

دونوں میں ایک ہاتھ کی دوری بناؤں گا

مدت سمیت جملہ ضوابط ہوں طے شدہ

یعنی تعلقات عبوری بناؤں گا

تجھ کو خبر نہ ہوگی کہ میں آس پاس ہوں

اس بار حاضری کو حضوری بناؤں گا

رنگوں پہ اختیار اگر مل سکا کبھی

تیری سیاہ پتلیاں بھوری بناؤں گا

جاری ہے اپنی ذات پہ تحقیق آج کل

میں بھی خلا پہ ایک تھیوری بناؤں گا

میں چاہ کر وہ شکل مکمل نہ کر سکا

اس کو بھی لگ رہا تھا ادھوری بناؤں گا

ik din zaban sukut ki puri banaunga

main guftugu ko ghair zaruri banaunga

taswir mein banaunga donon ke hath aur

donon mein ek hath ki duri banaunga

muddat samet jumla zawabat hun tai shuda

yaani taalluqat uburi banaunga

tujh ko khabar na hogi ke main as pas hun

is bar haziri ko huzuri banaunga

rangon pe ikhtiyar agar mil saka kabhi

teri siyah putliyan bhuri banaunga

jari hai apni zat pe tahqiq aj kal

main bhi khala pe ek thiwri banaunga

main chah kar wo shakl mukammal na kar saka

us ko bhi lag raha tha adhuri banaunga