دائیں بازو میں گڑا تیر نہیں کھینچ سکا

دائیں بازو میں گڑا تیر نہیں کھینچ سکا

اس لئے خول سے شمشیر نہیں کھینچ سکا

شور اتنا تھا کہ آواز بھی ڈبے میں رہی

بھیڑ اتنی تھی کہ زنجیر نہیں کھینچ سکا

ہر نظر سے نظر انداز شدہ منظر ہوں

وہ مداری ہوں جو رہ گیر نہیں کھینچ سکا

میں نے محنت سے ہتھیلی پہ لکیریں کھینچیں

وہ جنہیں کاتب تقدیر نہیں کھینچ سکا

میں نے تصویر کشی کر کے جواں کی اولاد

ان کے بچپن کی تصاویر نہیں کھینچ سکا

مجھ پہ اک ہجر مسلط ہے ہمیشہ کے لئے

ایسا جن ہے کہ کوئی پیر نہیں کھینچ سکا

تم پہ کیا خاک اثر ہوگا مرے شعروں کا

تم کو تو میر تقی میرؔ نہیں کھینچ سکا

daen bazu mein gira tir nahin khinch saka

is liye khol se shamshir nahin khinch saka

shor itna tha ke awaz bhi dabbe mein rahi

bhir itni thi ke zanjir nahin khinch saka

har nazar se nazar andaz shuda manzar hun

wo madari hun jo rah gir nahin khinch saka

main ne mehnat se hatheli pe lakiren khinchen

wo jinhen katib-e-taqdir nahin khinch saka

main ne taswir kashi kar ke jawan ki aulad

un ke bachpan ki tasawir nahin khinch saka

mujh pe ik hijr musallat hai hamesha ke liye

aisa jin hai ke koi pir nahin khinch saka

tum pe kya khak asar hoga mire sheron ka

tum ko to mir-e-taqi mir nahin khinch saka