مجھے پہلے تو لگتا تھا کہ ذاتی مسئلہ ہے

مجھے پہلے تو لگتا تھا کہ ذاتی مسئلہ ہے

میں پھر سمجھا محبت کائناتی مسئلہ ہے

پرندے قید ہیں تم چہچہاہٹ چاہتے ہو

تمہیں تو اچھا خاصا نفسیاتی مسئلہ ہے

ہمیں تھوڑا جنوں درکار ہے تھوڑا سکوں بھی

ہماری نسل میں اک جینیاتی مسئلہ ہے

بڑی مشکل ہے بنتے سلسلوں میں یہ توقف

ہمارے رابطوں کی بے ثباتی مسئلہ ہے

وہ کہتے ہیں کہ جو ہوگا وہ آگے جا کے ہوگا

تو یہ دنیا بھی کوئی تجرباتی مسئلہ ہے

ہمارا وصل بھی تھا اتفاقی مسئلہ تھا

ہمارا ہجر بھی ہے حادثاتی مسئلہ ہے

mujhe pahle to lagta tha ke zati masala hai

main phir samjha mohabbat kainati masala hai

parinde qaid hain tum chahchahahat chahte ho

tumhen to achchha khasa nafsiyati masala hai

hamen thora junun darkar hai thora sukun bhi

hamari nasl mein ik jiniyati masala hai

bari mushkil hai bante silsilon mein ye tawaqquf

hamare rabton ki be sabati masala hai

wo kahte hain ke jo hoga wo age ja ke hoga

to ye duniya bhi koi tajribati masala hai

hamara wasl bhi tha ittifaqi masala tha

hamara hijr bhi hai hadsati masala hai