ایک تاریخ مقرر پہ تو ہر ماہ ملے

ایک تاریخ مقرر پہ تو ہر ماہ ملے

جیسے دفتر میں کسی شخص کو تنخواہ ملے

رنگ اکھڑ جائے تو ظاہر ہو پلستر کی نمی

قہقہہ کھود کے دیکھو تو تمہیں آہ ملے

جمع تھے رات مرے گھر ترے ٹھکرائے ہوئے

ایک درگاہ پہ سب راندۂ درگاہ ملے

میں تو اک عام سپاہی تھا حفاظت کے لئے

شاہ زادی یہ ترا حق تھا تجھے شاہ ملے

ایک اداسی کے جزیرے پہ ہوں اشکوں میں گھرا

میں نکل جاؤں اگر خشک گزر گاہ ملے

اک ملاقات کے ٹلنے کی خبر ایسے لگی

جیسے مزدور کو ہڑتال کی افواہ ملے

گھر پہنچنے کی نہ جلدی نہ تمنا ہے کوئی

جس نے ملنا ہو مجھے آئے سر راہ ملے

ek tarikh muqarrar pe to har mah mile

jaise daftar mein kisi shakhs ko tankhwah mile

rang ukhar jae to zahir ho palsatar ki nami

qahqaha khod ke dekho to tumhen ah mile

jama the rat mire ghar tire thukrae hue

ek dargah pe sab randa-e-dargah mile

main to ik am sipahi tha hifazat ke liye

shah zadi ye tira haq tha tujhe shah mile

ek udasi ke jazire pe hun ashkon mein ghira

main nikal jaun agar khushk guzar gah mile

ik mulaqat ke talne ki khabar aise lagi

jaise mazdur ko hartal ki afwah mile

ghar pahunchne ki na jaldi na tamanna hai koi

jis ne milna ho mujhe ae sar-e-rah mile