نیم کے پتوں کا زخموں کو دھواں دے دیجئے

نیم کے پتوں کا زخموں کو دھواں دے دیجئے

پھر مری آنکھوں کو پہرے داریاں دے دیجئے

ہو سکے تو یہ نوازش ہم فقیروں پر کریں

بجھتے رنگوں کا ہمیں یہ آسماں دے دیجئے

شب پرستوں کو بھی تسکین انا مل جائے گی

ان کا حق ہے ان کو شب بیداریاں دے دیجئے

شاخ پر کانٹوں کو پیراہن بدلنے کے لیے

موسموں کو شبنمی بے سمتیاں دے دیجئے

بے حسی کا خشک سا صحرا ہے آنکھوں میں مری

دھول منظر سے تو کچھ طغیانیاں دے دیجئے

دھندلکے تو نوحہ خوانی میں بہت مصروف ہیں

رات زخمی ہے اسے بیساکھیاں دے دیجئے

عارضی موسم کو بھی احساس محرومی نہ ہو

گھر کے سناٹوں کو احساس زیاں دے دیجئے

دھوپ میں تھوڑی سی گنجائش نکل آئے تو رندؔ

ایک مٹھی چھاؤں کا ہی سائباں دے دیجئے

nim ke patton ka zakhmon ko dhuan de dijiye

phir miri ankhon ko pahre dariyan de dijiye

ho sake to ye nawazish ham faqiron par karen

bujhte rangon ka hamen ye asman de dijiye

shab paraston ko bhi taskin-e-ana mil jaegi

un ka haq hai un ko shab bedariyan de dijiye

shakh par kanton ko pairahan badalne ke liye

mausamon ko shabnami be samtiyan de dijiye

be hissi ka khushk sa sahra hai ankhon mein miri

dhul manzar se to kuchh tughyaniyan de dijiye

dhundalke to nauha khwani mein bahut masruf hain

rat zakhmi hai use besakhiyan de dijiye

arzi mausam ko bhi ehsas-e-mahrumi na ho

ghar ke sannaton ko ehsas-e-ziyan de dijiye

dhup mein thori si gunjaish nikal ae to rind

ek mutthi chhaon ka hi saiban de dijiye