پیش منظر جو تماشے تھے پس منظر بھی تھے

پیش منظر جو تماشے تھے پس منظر بھی تھے

ہم ہی تھے مال غنیمت ہم ہی غارت گر بھی تھے

آستینوں میں چھپا کر سانپ بھی لائے تھے لوگ

شہر کی اس بھیڑ میں کچھ لوگ بازی گر بھی تھے

برف منظر دھول کے بادل ہوا کے قہقہے

جو کبھی دہلیز کے باہر تھے وہ اندر بھی تھے

آخر شب درد کی ٹوٹی ہوئی بیساکھیاں

آڑے ترچھے زاویے موسم کے چہرے پر بھی تھے

رات ہم نے جگنوؤں کی سب دکانیں بیچ دیں

صبح کو نیلام کرنے کے لیے کچھ گھر بھی تھے

کچھ بلا عنوان رشتے اجنبی سرگوشیاں

رتجگوں کے جشن میں زخموں کے سوداگر بھی تھے

شب پرستوں کے نگر میں بت پرستی ہی نہ تھی

وحشتیں تھیں سنگ مرمر بھی تھا کاری گر بھی تھے

اس خرابے میں نئے موسم کی سازش تھی تو رندؔ

لذت احساس کے لمحوں کے جلتے پر بھی تھے

pesh manzar jo tamashe the pas manzar bhi the

ham hi the mal-e-ghanimat ham hi gharat gar bhi the

astinon mein chhupa kar sanp bhi lae the log

shahr ki is bhir mein kuchh log bazi gar bhi the

barf manzar dhul ke badal hawa ke qahqahe

jo kabhi dahliz ke bahar the wo andar bhi the

akhir-e-shab dard ki tuti hui besakhiyan

are tirchhe zawiye mausam ke chehre par bhi the

rat ham ne jugnuon ki sab dukanen bech den

subh ko nilam karne ke liye kuchh ghar bhi the

kuchh bala unwan rishte ajnabi sargoshiyan

ratjagon ke jashn mein zakhmon ke saudagar bhi the

shab paraston ke nagar mein but parasti hi na thi

wahshaten thin sang-e-marmar bhi tha kari gar bhi the

is kharabe mein nae mausam ki sazish thi to rind

lazzat-e-ehsas ke lamhon ke jalte par bhi the