ممتا بھری نگاہ نے روکا تو ڈر لگا

ممتا بھری نگاہ نے روکا تو ڈر لگا

جب بھی شکار زین سے باندھا تو ڈر لگا

تنہا فصیل شہر پہ بیٹھی ہوئی تھی شام

جب دھندلکوں نے شور مچایا تو ڈر لگا

اپنے سروں پہ پگڑیاں باندھے ہوئے تھے لفظ

مضمون جب نیا کوئی باندھا تو ڈر لگا

بجھتے ہوئے الاؤ میں آتش فشاں بھی تھے

کہرام رتجگوں نے مچایا تو ڈر لگا

اب دلدلی زمین بھی تو ہم سفر نہیں

دشت سراب سنگ سے گزرا تو ڈر لگا

ویران ساعتوں کے تھے یہ آخری نقوش

بے سمتیوں نے ہم کو بتایا تو ڈر لگا

آسودگی نے تھپکیاں دے کر سلا دیا

گھر کی ضرورتوں نے جگایا تو ڈر لگا

اے رندؔ الجھنوں سی رہی بے کراں سی سوچ

فکر سخن میں درد جو ابھرا تو ڈر لگا

mamta bhari nigah ne roka to dar laga

jab bhi shikar zain se bandha to dar laga

tanha fasil-e-shahr pe baithi hui thi sham

jab dhundalkon ne shor machaya to dar laga

apne saron pe pagriyan bandhe hue the lafz

mazmun jab naya koi bandha to dar laga

bujhte hue alao mein atish fishan bhi the

kohram ratjagon ne machaya to dar laga

ab daldali zamin bhi to ham safar nahin

dasht-e-sarab-e-sang se guzra to dar laga

wiran saaton ke the ye akhiri nuqush

be samtiyon ne ham ko bataya to dar laga

asudgi ne thapakiyan de kar sula diya

ghar ki zaruraton ne jagaya to dar laga

ai rind uljhanon si rahi be karan si soch

fikr-e-sukhan mein dard jo ubhra to dar laga