افق پہ دودھیا سایہ جو پاؤں دھرنے لگا

افق پہ دودھیا سایہ جو پاؤں دھرنے لگا

مہیب رات کا شیرازہ ہی بکھرنے لگا

تمام عمر جو لڑتا رہا مرے اندر

مرا ضمیر ہی مجھ سے فرار کرنے لگا

سفر میں جب کبھی لا سمتیوں کا ذکر ہوا

ہمارا قافلہ طول سفر سے ڈرنے لگا

سلگ رہا ہے کہیں دور درد کا جنگل

جو آسمان پہ کڑوا دھواں بکھرنے لگا

چڑھی ندی کو میں پایاب کر کے کیا آیا

تمام شہر ہی دریا کے پار کرنے لگا

عجیب کرب سے گزرا ہے جگنوؤں کا جلوس

کہاں ٹھہرنا تھا اس کو کہاں ٹھہرنے لگا

ہمارے ساتھ رہی ہے سفر میں بے خبری

جنوں میں سوچ کا امکان کام کرنے لگا

بہت عجیب ہے باطن کی گمرہی اے رندؔ

سکوت ظاہری ٹکڑوں میں تھا بکھرنے لگا

ufuq pe dudhiya saya jo paon dharne laga

muhib rat ka shiraza hi bikharne laga

tamam umr jo larta raha mire andar

mira zamir hi mujh se farar karne laga

safar mein jab kabhi la samtiyon ka zikr hua

hamara qafila tul-e-safar se darne laga

sulag raha hai kahin dur dard ka jangal

jo asman pe karwa dhuan bikharne laga

charhi nadi ko main payab kar ke kya aya

tamam shahr hi dariya ke par karne laga

ajib karb se guzra hai jugnuon ka julus

kahan thaharna tha us ko kahan thaharne laga

hamare sath rahi hai safar mein be khabari

junun mein soch ka imkan kam karne laga

bahut ajib hai batin ki gumrahi ai rind

sukut-e-zahiri tukron mein tha bikharne laga