روشنی بھر خلا پہ بار تھے ہم

روشنی بھر خلا پہ بار تھے ہم

دھند منظر پس غبار تھے ہم

دھوپ میں آئے تو سکون ملا

چھاؤں میں تھے تو داغ دار تھے ہم

کوئی دستک نہ کوئی آہٹ تھی

مدتوں وہم کے شکار تھے ہم

بت گری میں ہنر بھی شامل تھا

سنگ سازی سے ہوشیار تھے ہم

قرض کوئی بھی جسم و جاں پہ نہ تھا

زندگی پر مگر ادھار تھے ہم

ظلمتیں تو چراغ خیمہ تھیں

خلوتوں کے گناہ گار تھے ہم

فکر و معنی تلازمے تشبیہ

اے غزل تیرے جاں نثار تھے ہم

رندؔ تھا بیکسی کا لطف عجیب

گھر میں رہ کر بھی بے دیار تھے ہم

raushni bhar khala pe bar the ham

dhund manzar pas ghubar the ham

dhup mein ae to sukun mila

chhaon mein the to dagh dar the ham

koi dastak na koi ahat thi

muddaton wahm ke shikar the ham

but giri mein hunar bhi shamil tha

sang sazi se hoshyar the ham

qarz koi bhi jism-o-jan pe na tha

zindagi par magar udhar the ham

zulmaten to charagh khema thin

khalwaton ke gunah gar the ham

fikr-o-maani talazime tashbih

ai ghazal tere jan nisar the ham

rind tha bekasi ka lutf ajib

ghar mein rah kar bhi be dayar the ham