مانا کہ زلزلہ تھا یہاں کم بہت ہی کم

مانا کہ زلزلہ تھا یہاں کم بہت ہی کم

بستی میں بچ گئے تھے مکاں کم بہت ہی کم

میرے لہو کا ذائقہ چکھتا رہا تھا درد

تنہائیاں تھیں رات جہاں کم بہت ہی کم

کانٹوں کو سینچتی رہی پرچھائیوں کی فصل

جب دھوپ کا تھا نام و نشاں کم بہت ہی کم

آنگن میں دھوپ دھوپ کو اوڑھے اداسیاں

گھر میں تھے زندگی کے نشاں کم بہت ہی کم

مفلوج رات کرب کے بستر پہ لیٹ کر

کرتی ہے اب تو آہ و فغاں کم بہت ہی کم

کیوں دوستوں کی بھیڑ سے گھبرا نہ جائے دل

دشمن تو رہ گئے ہیں یہاں کم بہت ہی کم

ہم جب سے پتھروں کی تجارت میں لگ گئے

ہے دوستیٔ شیشہ گراں کم بہت ہی کم

اتنی اذیتوں سے گزرنے کے بعد رندؔ

خود پر ہے زندگی کا گماں کم بہت ہی کم

mana ke zalzala tha yahan kam bahut hi kam

basti mein bach gae the makan kam bahut hi kam

mere lahu ka zaiqa chakhta raha tha dard

tanhaiyan thin rat jahan kam bahut hi kam

kanton ko sinchti rahi parchhaiyon ki fasl

jab dhup ka tha nam-o-nishan kam bahut hi kam

angan mein dhup dhup ko orhe udasiyan

ghar mein the zindagi ke nishan kam bahut hi kam

mafluj rat karb ke bistar pe let kar

karti hai ab to ah-o-fughan kam bahut hi kam

kyun doston ki bhir se ghabra na jae dil

dushman to rah gae hain yahan kam bahut hi kam

ham jab se pattharon ki tijarat mein lag gae

hai dosti-e-shisha giran kam bahut hi kam

itni aziyyaton se guzarne ke baad rind

khud par hai zindagi ka guman kam bahut hi kam