دیار شوق میں آئے تھے ایک خواب کے ساتھ

دیار شوق میں آئے تھے ایک خواب کے ساتھ

گزر رہی ہے مسلسل کسی عذاب کے ساتھ

ہم اہل درد پکارے گئے صحیفوں میں

ہم اہل عشق اتارے گئے کتاب کے ساتھ

پھر ایک شام پذیرائی چشم تر کی ہوئی

پھر ایک شام گزاری گئی جناب کے ساتھ

ہمیں یہ خوف اندھیرے نگل نہ جائیں کہیں

سو ہم نے جسم کو ڈھانپا ہے آفتاب کے ساتھ

مکالمہ رہا جاری ہماری آنکھوں کا

بدن کی شاخ پہ کھلتے ہوئے گلاب کے ساتھ

کچھ اور چاہیے تشنہ لبی مٹانے کو

یہ پیاس وہ ہے جو بجھتی نہیں شراب کے ساتھ

زعیمؔ وہ مری دریا دلی سے ڈرتا ہے

وہ مجھ سے ملتا ہے لیکن بڑے حساب کے ساتھ

dayar-e-shauq mein ae the ek khwab ke sath

guzar rahi hai musalsal kisi azab ke sath

ham ahl dard pukare gae sahifon mein

ham ahl ishq utare gae kitab ke sath

phir ek sham pazirai chashm-e-tar ki hui

phir ek sham guzari gai janab ke sath

hamen ye khauf andhere nigal na jaen kahin

so ham ne jism ko dhanpa hai aftab ke sath

mukalama raha jari hamari ankhon ka

badan ki shakh pe khulte hue gulab ke sath

kuchh aur chahiye tishna labi mitane ko

ye pyas wo hai jo bujhti nahin sharab ke sath

zaim wo miri dariya dili se darta hai

wo mujh se milta hai lekin bare hisab ke sath