حسن آنکھوں میں رہے دل میں جوانی تو رہے

حسن آنکھوں میں رہے دل میں جوانی تو رہے

زندگانی تیرے ہونے کی نشانی تو رہے

اس کی خاطر تو گوارا کوئی بن باس بھی ہے

سب کے ہونٹوں پہ مری رام کہانی تو رہے

ضبط میں یہ بھی ہے گویائی کا اپنا انداز

لب ہوں خاموش مگر اشک فشانی تو رہے

گر اجالوں سے گریزاں ہے دھندلکوں میں تو آ

دن بہ ہر طور کٹا شام سہانی تو رہے

تو نہ شیریں نہ میں فرہاد مگر یوں تو ملیں

ہم رہیں یا نہ رہیں اپنی کہانی تو رہے

آؤ کچھ دیر کریں پہلے پہل کی باتیں

یاد اس پیار کی وہ رسم پرانی تو رہے

تیری آنکھیں تو بنیں خشک جزیرے جعفرؔ

یہ جو دریا ہیں تو دریاؤں میں پانی تو رہے

husn ankhon mein rahe dil mein jawani to rahe

zindagani tere hone ki nishani to rahe

us ki khatir to gawara koi ban bas bhi hai

sab ke honton pe miri ram kahani to rahe

zabt mein ye bhi hai goyai ka apna andaz

lab hun khamosh magar ashk fishani to rahe

gar ujalon se gurezan hai dhundalkon mein to a

din ba har taur kata sham suhani to rahe

tu na shirin na main farhad magar yun to milen

ham rahen ya na rahen apni kahani to rahe

ao kuchh der karen pahle pahal ki baten

yad is pyar ki wo rasm purani to rahe

teri ankhen to banen khushk jazire jaafar

ye jo dariya hain to dariyaon mein pani to rahe