بجلی کڑکی بادل گرجا میں خاموش رہا

بجلی کڑکی بادل گرجا میں خاموش رہا

اس کہرام میں بھی اے دنیا میں خاموش رہا

صبح کی چاپ نے مجھ کو صدا دی میں نے بات نہ کی

شام کی چپ نے مجھ کو پکارا میں خاموش رہا

کتنے گیت بکھیرتے موسم میرے سامنے آئے

میں تھا جاتی رت کا سایا میں خاموش رہا

گزرے میرے پاس سے ہو کر شور بھرے میلے

سیل حوادث تو نے دیکھا میں خاموش رہا

کتنے پانی سر سے گزرے میری زباں نہ کھلی

ساحل ساحل دریا دریا میں خاموش رہا

جعفرؔ دیکھ کے غم برساتی زندگیوں کے سمے

بیت گئی اس دل پر کیا کیا میں خاموش رہا

bijli karki badal garja mein khamosh raha

is kohram mein bhi ai duniya mein khamosh raha

subh ki chap ne mujh ko sada di main ne bat na ki

sham ki chup ne mujh ko pukara mein khamosh raha

kitne git bikherte mausam mere samne ae

main tha jati rut ka saya mein khamosh raha

guzre mere pas se ho kar shor bhare mele

sail-e-hawadis tu ne dekha main khamosh raha

kitne pani sar se guzre meri zaban na khuli

sahil sahil-e-dariya dariya mein khamosh raha

jaafar dekh ke gham barsati zindagiyon ke samay

bit gai is dil par kya kya main khamosh raha