جی لرزتا ہے امڈتی ہوئی تنہائی سے

جی لرزتا ہے امڈتی ہوئی تنہائی سے

اب نکالو مجھے اس رات کی پہنائی سے

آئی یادوں کی ہوا گھلنے لگا کان میں زہر

بجھ گئی شام بھی بجتی ہوئی شہنائی سے

پوچھتا پھرتا ہوں گلیوں کے اجڑنے کا سبب

ہر طرف جمع ہیں کیا لوگ تماشائی سے

سامنے پھیلا ہوا دشت کا سناٹا ہے

اب کہاں بچ کے چلیں ہم دل سودائی سے

بن گیا ایک قیامت در دل تک آنا

اور گزرنا ہے ابھی دھیان کی انگنائی سے

کس طرح اپنا بنائیں اسے ہم اے جعفرؔ

بات آگے نہ بڑھی جس کی شناسائی سے

ji larazta hai umadti hui tanhai se

ab nikalo mujhe is rat ki pahnai se

ai yadon ki hawa ghulne laga kan mein zahr

bujh gai sham bhi bajti hui shahnai se

puchhta phirta hun galiyon ke ujarne ka sabab

har taraf jama hain kya log tamashai se

samne phaila hua dasht ka sannata hai

ab kahan bach ke chalen ham dil-e-saudai se

ban gaya ek qayamat dar-e-dil tak ana

aur guzarna hai abhi dhyan ki angnai se

kis tarah apna banaen use ham ai jaafar

bat age na barhi jis ki shanasai se