اپنے احساس سے باہر نہیں ہونے دیتا

اپنے احساس سے باہر نہیں ہونے دیتا

راز ظاہر بھی یہ مجھ پر نہیں ہونے دیتا

خوف رسوائی سے کر دیتا ہے حیراں ایسا

میری آنکھوں کو سمندر نہیں ہونے دیتا

موم کر دیتا ہے جب لوٹ کے آ جاتا ہے

مجھ کو فرقت میں وہ پتھر نہیں ہونے دیتا

دیکھتا ہوں تو کبھی چاند کبھی پھول ہے وہ

اپنی صورت مجھے ازبر نہیں ہونے دیتا

جی میں ہے اڑ کے چلا جاؤں جہاں رہتا ہے

وہ مرا گھر بھی مرا گھر نہیں ہونے دیتا

جب بھی ملتا ہے تو بس ٹوٹ کے ملتا ہے مجھے

اپنے غم کا مجھے خوگر نہیں ہونے دیتا

روٹھ بھی جاتے ہیں جعفرؔ تو منا لینے میں

مجھ کو اپنے سے وہ بہتر نہیں ہونے دیتا

apne ehsas se bahar nahin hone deta

raz zahir bhi ye mujh par nahin hone deta

khauf-e-ruswai se kar deta hai hairan aisa

meri ankhon ko samundar nahin hone deta

mom kar deta hai jab laut ke a jata hai

mujh ko furqat mein wo patthar nahin hone deta

dekhta hun to kabhi chand kabhi phul hai wo

apni surat mujhe azbar nahin hone deta

ji mein hai ur ke chala jaun jahan rahta hai

wo mira ghar bhi mira ghar nahin hone deta

jab bhi milta hai to bas tut ke milta hai mujhe

apne gham ka mujhe khugar nahin hone deta

ruth bhi jate hain jaafar to mana lene mein

mujh ko apne se wo behtar nahin hone deta