دن نکلتا ہے تو سامان سفر ڈھونڈتے ہیں

دن نکلتا ہے تو سامان سفر ڈھونڈتے ہیں

رات پڑتی ہے تو ہم اپنی خبر ڈھونڈتے ہیں

رابطہ کچھ تو رہے روح کا پاتال کے ساتھ

آج ہم بھی تری آنکھوں میں بھنور ڈھونڈتے ہیں

کوئی خوشبو نہ یہاں انجم و مہتاب کی ضو

ان گھروں سے بہت آگے ہے جو گھر ڈھونڈتے ہیں

عشق سے داد طلب ہیں کہ ہم آوارہ منش

در میں دیوار نہ دیوار میں در ڈھونڈتے ہیں

کیوں جدائی کے مہ و سال میں بدلے تو نے

آ محبت کے وہی شام و سحر ڈھونڈتے ہیں

وہ جو اب سرحد امکاں سے پرے رہتا ہے

کب وہ جعفرؔ ہمیں ملتا ہے مگر ڈھونڈتے ہیں

din nikalta hai to saman-e-safar dhundte hain

rat parti hai to ham apni khabar dhundte hain

rabta kuchh to rahe ruh ka patal ke sath

aj ham bhi tiri ankhon mein bhanwar dhundte hain

koi khushbu na yahan anjum-o-mahtab ki zau

in gharon se bahut age hai jo ghar dhundte hain

ishq se dad talab hain ke ham awara manish

dar mein diwar na diwar mein dar dhundte hain

kyun judai ke mah-o-sal mein badle tu ne

a mohabbat ke wahi sham-o-sahar dhundte hain

wo jo ab sarhad-e-imkan se pare rahta hai

kab wo jaafar hamen milta hai magar dhundte hain