جاگے سے کتنے گھر دیکھے رات کی خامشی میں

جاگے سے کتنے گھر دیکھے رات کی خامشی میں

دیوار پہ سائے ہی تو تھے رات کی خامشی میں

گل بوٹے اور باغ جب سو جاتے ہیں خوابوں کو اوڑھے

تب رات رانی ہی خوشبو دے رات کی خامشی میں

دن بھر خود اپنی لگائی آتش میں دل جل رہا تھا

اب شمع سا بجھ رہا ہے یہ رات کی خامشی میں

تنہائی میں چبھتے ہیں جب یادوں کے نشتر سے اکثر

گوشہ میں ہم روتے ہیں کھل کے رات کی خامشی میں

گر نیند ہے تو پھر ان جلتی آنکھوں میں تو اتر آ

گر موت ہے تو لے چل یاں سے رات کی خامشی میں

کاٹی نہیں جاتی اب مجھ سے ہجر کی لمبی راتیں

کوئی مرے دل کو بہلا دے رات کی خامشی میں

ہو جھیل میں چاند اترا یا خواب میں کھوئی وانیؔ

سب اپنے ہی اشک سے بھیگے رات کی خامشی میں

jage se kitne ghar dekhe rat ki khamushi mein

diwar pe sae hi to the rat ki khamushi mein

gul bute aur bagh jab so jate hain khwabon ko orhe

tab rat rani hi khushbu de rat ki khamushi mein

din bhar khud apni lagai atish mein dil jal raha tha

ab shama sa bujh raha hai ye rat ki khamushi mein

tanhai mein chubhte hain jab yadon ke nashtar se aksar

gosha mein ham rote hain khul ke rat ki khamushi mein

gar nind hai to phir un jalti ankhon mein to utar a

gar maut hai to le chal yan se rat ki khamushi mein

kati nahin jati ab mujh se hijr ki lambi raten

koi mire dil ko bahla de rat ki khamushi mein

ho jhil mein chand utra ya khwab mein khoi wani

sab apne hi ashk se bhige rat ki khamushi mein