میں گہری نیند میں تھا جب کہ یہ بھیجی گئی دنیا

میں گہری نیند میں تھا جب کہ یہ بھیجی گئی دنیا

اب استعمال کرنی ہے مجھے دے دی گئی دنیا

بہ وقت صبح لگتا تھا کہ کچھ کچھ دسترس میں ہے

جو آئی شام ہاتھوں سے مرے لے لی گئی دنیا

پڑی ہے جا بجا ٹوٹے ہوئے شیشے کے ٹکڑوں سی

کسی انجان کھڑکی سے کبھی پھینکی گئی دنیا

مرے در پر نئے دن کو مہکتے پھول کی صورت

سحر جو رکھ گئی تھی شام کو لیتی گئی دنیا

یہ اپنا دیش ہے آ جائیں گے واپس یہیں پھر بھی

چلو ڈھونڈیں اسے جو خواب میں دیکھی گئی دنیا

main gahri nind mein tha jab ke ye bheji gai duniya

ab istemal karni hai mujhe de di gai duniya

ba waqt-e-subh lagta tha ke kuchh kuchh dastaras mein hai

jo ai sham hathon se mire le li gai duniya

pari hai ja baja tute hue shishe ke tukron si

kisi anjan khirki se kabhi phenki gai duniya

mire dar par nae din ko mahakte phul ki surat

sahar jo rakh gai thi sham ko leti gai duniya

ye apna desh hai a jaenge wapas yahin phir bhi

chalo dhunden use jo khwab mein dekhi gai duniya