خوشبو کا بھی وہی ہے جو ہے چلن ہوا کا

خوشبو کا بھی وہی ہے جو ہے چلن ہوا کا

اس کا بدن ہوا کا ہے پیرہن ہوا کا

کل رات یاد جاناں یا چاندنی کے باعث

بے حد چمک رہا تھا سیماب تن ہوا کا

صدیوں گیا وہ اس کے پیچھے حد جہاں تک

لیکن نہ ڈھونڈ پایا ملک و وطن ہوا کا

اپنے بدن سے ہٹ کر محسوس کر سکو تو

تم کو دکھائی دے گا عریاں بدن ہوا کا

میرے قریب آئی خوشبو ہوا پہن کر

پلٹی تو بن گئی تھی خود پیرہن ہوا کا

طوفاں کے بعد دیکھا گلشن کے ہر شجر نے

بے دم پڑی تھی خوشبو اوڑھے کفن ہوا کا

khushbu ka bhi wahi hai jo hai chalan hawa ka

us ka badan hawa ka hai pairahan hawa ka

kal rat yad janan ya chandni ke bais

be had chamak raha tha simab tan hawa ka

sadiyon gaya wo us ke pichhe had jahan tak

lekin na dhund paya mulk-o-watan hawa ka

apne badan se hat kar mahsus kar sako to

tum ko dikhai dega uryan badan hawa ka

mere qarib ai khushbu hua pahan kar

palti to ban gai thi khud pairahan hawa ka

tufan ke baad dekha gulshan ke har shajar ne

be dam pari thi khushbu orhe kafan hawa ka