زندگی چین پا نہیں سکتی

زندگی چین پا نہیں سکتی

موت کو موت آ نہیں سکتی

پھونک سکتی ہے برق گلشن کو

پھول اس میں کھلا نہیں سکتی

توڑ دیتی ہے موت ساز حیات

لیکن اس کو بجا نہیں سکتی

تم نہ چاہو تو یہ نسیم بہار

گل چمن میں کھلا نہیں سکتی

زندگی لاکھ تابدار سہی

موت کی تاب لا نہیں سکتی

ہم پہ ہنسنا تو اس کو آتا ہے

ہم کو دنیا ہنسا نہیں سکتی

ہم سے انساں کہاں ملیں گے اسے

ہم کو دنیا بھلا نہیں سکتی

zindagi chain pa nahin sakti

maut ko maut a nahin sakti

phunk sakti hai barq gulshan ko

phul is mein khula nahin sakti

tor deti hai maut saz-e-hayat

lekin us ko baja nahin sakti

tum na chaho to ye nasim-e-bahar

gul chaman mein khula nahin sakti

zindagi lakh tabdar sahi

maut ki tab la nahin sakti

ham pe hansna to us ko ata hai

ham ko duniya hansa nahin sakti

ham se insan kahan milenge use

ham ko duniya bhala nahin sakti