یوں دل دیوانہ کو اکثر سزا دیتا ہوں میں

یوں دل دیوانہ کو اکثر سزا دیتا ہوں میں

اپنی بربادی پہ خود ہی مسکرا دیتا ہوں میں

اپنے دل کے خون سے وہ گل کھلا دیتا ہوں میں

ریگزاروں کو گلستاں کی ادا دیتا ہوں میں

ایسی منزل پر مجھے پہنچا دیا ہے عشق نے

میرا جو قاتل ہے اس کو بھی دعا دیتا ہوں میں

کیوں کسی کا نام لے کر عشق کو رسوا کروں

اپنے دل کی آگ کو خود ہی ہوا دیتا ہوں میں

ذکر یوں کرتا ہوں اپنے غم کا اپنے درد کا

ہوش والوں کو بھی دیوانہ بنا دیتا ہوں میں

کیا گزرتی ہے مرے دل پر خدارا کچھ نہ پوچھ

دشمنوں کو جب تلک گھر کا پتا دیتا ہوں میں

اپنی ہی آواز خود لگتی ہے مجھ کو اجنبی

جب اکیلے میں کبھی تجھ کو صدا دیتا ہوں میں

نشتر یاد غم جاناں سے قیصرؔ ان دنوں

زخم جو سوتے ہیں ان کو پھر جگا دیتا ہوں میں

yun dil-e-diwana ko aksar saza deta hun main

apni barbadi pe khud hi muskura deta hun main

apne dil ke khun se wo gul khula deta hun main

regzaron ko gulistan ki ada deta hun main

aisi manzil par mujhe pahuncha diya hai ishq ne

mera jo qatil hai us ko bhi dua deta hun main

kyun kisi ka nam le kar ishq ko ruswa karun

apne dil ki ag ko khud hi hua deta hun main

zikr yun karta hun apne gham ka apne dard ka

hosh walon ko bhi diwana bana deta hun main

kya guzarti hai mire dil par khudara kuchh na puchh

dushmanon ko jab talak ghar ka pata deta hun main

apni hi awaz khud lagti hai mujh ko ajnabi

jab akele mein kabhi tujh ko sada deta hun main

nashtar yad gham-e-janan se qaisar in dinon

zakhm jo sote hain un ko phir jaga deta hun main