خواب جو دیکھے ہیں میں نے انہیں پیکر دے گا

خواب جو دیکھے ہیں میں نے انہیں پیکر دے گا

میرا صحرا مجھے اک روز سمندر دے گا

ایک قطرہ جو لرزتا ہے مری پلکوں پر

زرد موسم کو یہی قطرہ ہرا کر دے گا

مجھ کو کچھ اور فضاؤں میں بکھر جانے دو

میرا احساس خلاؤں میں مجھے گھر دے گا

ہوں گنہ گار مگر اتنا گنہ گار نہیں

مجھ کو دے گا بھی تو وہ پھول سا پتھر دے گا

سوچتا ہوں تو تھکن اور بھی بڑھ جاتی ہے

پھر مجھے اذن سفر حرف مکرر دے گا

اسی عالم میں مرے خوابوں کی دنیا بھی ہے

میری دنیا کو بھی وقت ایک پیمبر دے گا

میرے ہم راز مرے دوست مرے ساتھ نہ چل

لمحہ لمحہ تجھے آواز کی ٹھوکر دے گا

khwab jo dekhe hain main ne unhen paikar dega

mera sahra mujhe ik roz samundar dega

ek qatra jo larazta hai miri palkon par

zard mausam ko yahi qatra hara kar dega

mujh ko kuchh aur fazaon mein bikhar jane do

mera ehsas khalaon mein mujhe ghar dega

hun gunah gar magar itna gunah gar nahin

mujh ko dega bhi to wo phul sa patthar dega

sochta hun to thakan aur bhi barh jati hai

phir mujhe izn-e-safar harf-e-mukarrar dega

isi alam mein mire khwabon ki duniya bhi hai

meri duniya ko bhi waqt ek payambar dega

mere ham raz mire dost mire sath na chal

lamha lamha tujhe awaz ki thokar dega